ដោយ៖ មាន រតនា
ព្រះវិហារ៖ នៅព្រឹកថ្ងៃទី០៩ ខែមិថុនា ឆ្នាំ២០២០នេះ រដ្ឋបាលខេត្តព្រះវិហារ បានរៀបចំកិច្ចប្រជុំគណៈបញ្ជាការឯកភាពរដ្ឋបាលខេត្តព្រះវិហារ ក្រោមអធិបតីភាពឯកឧត្តម ប្រាក់ សុវណ្ណ អភិបាល នៃគណៈអភិបាលខេត្ត និងជាប្រធានគណៈបញ្ជាការឯកភាពខេត្ត ដោយមានការចូលរួមពី លោក លោកស្រីអភិបាលរងខេត្ត មេបញ្ជាការកងកម្លាំងទាំងបី ប្រធានមន្ទីរអង្គភាពជុំវិញខេត្ត អភិបាលក្រុង ស្រុក អធិការក្រុង ស្រុក មេឃុំចៅសង្កាត់ មេប៉ុស្តិ៍ជាច្រើនរូប។
ក្នុងឱកាសនោះ ឯកឧត្តម ប្រធានគណៈបញ្ជាការឯកភាពរដ្ឋបាលខេត្ត បានមានប្រសាសន៍ជម្រាបជូនពីកិច្ចការចាំបាច់គឺក្តាប់សភាពការណ៍ទូទៅ និងដាក់ចេញវិធានការអនុវត្ត កិច្ចការពារសន្តិសុខ សណ្តាប់ធ្នាប់សាធារណៈ ធានា និងរក្សាបាននូវសភាពការណ៍ស្ងប់ស្ងាត់ និងល្អប្រសើរបានគ្រប់គោលដៅ យុទ្ធនាការបង្រ្កាប និងទប់ស្កាត់បទល្មើសធនធានធម្មជាតិនៅក្នុងភូមិសាស្រ្តខេត្តព្រះវិហារដែលជាគោលដៅរួមនៅទូទាំង ប្រទេស ។
ឯកឧត្តម បានដាក់ចេញនូវវិធានការមួយចំនួនដូចខាងក្រោម៖
១. បង្កើនកិច្ចសហប្រតិបត្តិការ និងរក្សាទំនាក់ទំនងល្អរវាងអាជ្ញាធរ និងអជ្ញាធរ កងកម្លាំង និងកម្លាំង ជាមួយខេត្តជាប់ព្រំដែនកម្ពុជា-ថៃ-ឡាវ ដោយពង្រឹងការផ្លាស់ប្តូរព័ត៌មានគ្នាទៅវិញទៅមកជាប្រចាំ ដើម្បីបង្រ្កាប និងទប់ស្កាត់បទល្មើសឆ្លងដែន និងបទល្មើសផ្សេងៗទៀតនៅតាមបណ្តោយព្រំដែន។
២. អនុវត្តឲ្យបានម៉ឺងម៉ាត់ និងម៉ត់ចត់ នូវវិធានបង្រ្កាប និងទប់ស្កាត់បទល្មើសធនធានធម្មជាតិក្នុងភូមិសាស្រ្តខេត្តព្រះវិហារ។
៣. អនុវត្តឲ្យបានម៉ឺងម៉ាត់ ចំពោះការកាប់រានទន្ទ្រានដីព្រៃ ដើម្បីយកធ្វើជាកម្មសិទ្ធិ។
៤. រដ្ឋបាលក្រុង-ស្រុក ត្រូវគ្រប់គ្រងដីធ្លី ដែលជាសម្បត្តិសាធារណៈរបស់រដ្ឋ ឲ្យបានហ្មត់ចត់ និងត្រូវទប់ស្កាត់ការចូលកាប់ទន្ទ្រានយកដីធ្វើជាកម្មសិទ្ធិឲ្យបានទាន់ពេលវេលា។
៥. អភិបាលក្រុង-ស្រុក មេឃុំ-ចៅសង្កាត់ ត្រូវបញ្ឈប់ការបញ្ជាក់ដី ដែលគ្មានការចូលរួម និងគ្មាននិយាមការពីមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត។
៦. ជម្រុញការរៀបចំផែនទី នៅតាមក្រុង-ស្រុក នូវទីតាំងដែលប៉ះពាល់លើដែនបរិស្ថាន និងដីរដ្ឋផ្សេងៗទៀត។
៧. រដ្ឋបាលក្រុង-ស្រុក ត្រូវពន្លឿនការដោះស្រាយវិវាទដីធ្លី យ៉ាងហោចណាស់០២សំណុំរឿង ក្នុងមួយសប្ដាហ៏ ក្នុងករណីដោះស្រាយតាមនីតិវិធីមិនជោគជ័យ ត្រូវបញ្ជូនមកគណៈកម្មការដោះស្រាយវិវាទដីធ្លីថ្នាក់ខេត្ត។
៨. រដ្ឋបាលក្រុង-ស្រុក ឃុំ-សង្កាត់ នីមួយៗ ត្រូវក្ដាប់ឱ្យបានអំពីគ្រប់មុខសញ្ញាតវ៉ា ជាពិសេសរឿងដីធ្លី ធ្វើយ៉ាងណាទប់ស្កាត់កុំឲ្យមកតវ៉ាដល់សាលាខេត្ត ឬទៅតវ៉ាដល់រាជធានីភ្នំពេញ បើទប់មិនជាប់ទេ ត្រូវរាយការណ៍មកថ្នាក់ខេត្តឲ្យបានទាន់ពេលវេលា។
៩. មន្ទីរដែនដី នគរូបនីយកម្ម សំណង់ និងសុរិយោដីខេត្ត ត្រូវសហការជាមួយរដ្ឋបាលក្រុង-ស្រុក ពន្លឿនការចុះបញ្ជីដីរដ្ឋ ឲ្យបានមុនដំណាច់ឆ្នាំ២០២១ និងសហការជាមួយមន្ទីរកសិកម្ម រុក្ខាប្រមាញ់ និងនេសាទខេត្ត ដើម្បីពន្លឿនការចុះបញ្ជីក្រុមហ៊ុនដីសម្បទានសេដ្ឋកិច្ច។
១០. រដ្ឋបាលក្រុង-ស្រុក ឃុំ-សង្កាត់ ត្រូវពន្លឿនការផ្ដល់សេវាសាធារណៈ ជូនបងប្អូនប្រជាពលរដ្ឋ។
១១. ត្រូវចូលរួម និងណែនាំប្រជាពលរដ្ឋ ឲ្យគោរពច្បាប់ចរាចណ៍ផ្លូវគោក។
១២. ប្រធានមន្ទីរ អង្គភាព និងកម្លាំងសមត្ថកិច្ចពាក់ព័ន្ធ ត្រូវចូលរួមត្រៀមបង្ការ នូវគ្រោះមហន្តរាយដោយសារជំនន់ទឹកភ្លៀងនារដូវវស្សានេះ។
១៣. រដ្ឋបាលក្រុង ស្រុក និងមន្ទីរ អង្គភាពជុំវិញខេត្តទាំងអស់ត្រូវរក្សាទំនាក់ទំនង ឲ្យបានល្អ ហើយត្រូវរៀបចំសោភណ្ឌភាព បរិស្ថាន តាមអង្គភាពរបស់ខ្លួនឲ្យបានស្អាត។
១៤.បញ្ហាកូវីដ១៩ នៅតែបន្តគំរាមកំហែងកម្ពុជាយើង និងពិភពលោក ដូច្នេះខ្ញុំសូម អាជ្ញាធរពាក់ព័ន្ធបន្តរឹតបន្តឹងវិធានការដែលមានស្រាប់ ដើម្បីកុំឲ្យមានការឆ្លងទៅសហគមន៍៕