ភ្នំពេញ៖ ចាស់ៗតែងតែនិយាយថា «ចង្កៀងដុតនៅផ្ទះអ្នកណាគឺភ្លឺនៅផ្ទះអ្នកនោះ» ការលើកឡើងនេះបានឆ្លុះបញ្ចាំងនៃជីវិតពិតរបស់សត្វលោកនាបច្ចុប្បន្ននេះ អ្វីដែលយើងមើលឃើញនឹងភ្នែកមិនមែងជារឿងពិតទាំងអស់នោះឡើយ ជួនយើងមើលឃើញគ្រួសារខ្លះ ជិះរថយន្ដទំនើបៗនិងមានគ្រឿងអលង្ការតុបតែងខ្លួនបែបស៊ីវីល័យតែមានខ្លះជំពាក់គេ(វ័ន.ក)ក៏មានដែរ។
ជាក់ស្ដែង កាលពីយប់ ថ្ងៃទី១១ ខែមិថុនា ឆ្នាំ២០២០ ម្សិលមិញនេះ មានស្ត្រីជាម្តាយ និងកូនប្រុស បានសម្រេចធ្វើអត្តឃាត គួរអោយសង្វេកនិងបង្ករឲ្យមានការភ្ញាក់ផ្អើលជាខ្លាំង នៅត្រង់ចំណុចភូមិ ដំណាក់ធំ១ និងចំណុចស្ពានអាកាសស្ទឹងមានជ័យ សង្កាត់ស្ទឹងមានជ័យ២ ខណ្ឌមានជ័យ។
សពស្ត្រីជាម្តាយឈ្មោះ ខៀវ ចាន់ស៊ីណែត ភេទស្រី អាយុ៤៩ឆ្នាំ មុខរបរគ្រូបង្រៀន បានចង.កនៅនឹងបង្កាន់ដៃកាំជណ្តើរផ្ទះរបស់ខ្លួន នៅចំនុចផ្ទះលេខ១៧B ក្រុម៧ ភូមិដំណាក់ធំ១ សង្កាត់ស្ទឹងមានជ័យ២ ខណ្ឌមានជ័យ។ ចំណែកកូនប្រុស ឈ្មោះ ចាន់ មាស វិសាល ភេទប្រុស អាយុ២៤ ឆ្នាំ មុខរបរ វិស្វករបានលោតពីលើស្ពានអាកាសស្ទឹងមានជ័យ បណ្តាលឲ្យរងរបួសធ្ងន់។
ករណីធ្វើអត្តឃាតបន្តបន្ទាប់គ្នានេះ មូលហេតុម្តាយ និងកូនប្រុសទាំងពីរ បានជំពាក់លុយធនាគារជាង១០ម៉ឺនដុល្លារ ហើយត្រូវបានកូនឈ្មោះ ចាន់ មាសវិសាល បំផ្លាញអស់ និងធ្លាប់បានវាយធ្វើបាបម្តាយទៀត។
ចំណែកឈ្មោះ ចាន់ មាស វិសាល (ត្រូវជាកូន) ឃើញម្តាយចង.កបែបនេះ ក៏សម្រេចចិត្តទៅលោតសម្លាប់ខ្លួនពីលើស្ពានអាកាសស្ទឹងមានជ័យ តែមិនស្លាប់រងរបួសធ្ងន់។
បច្ចុប្បន្ននេះ សពស្ត្រីជាម្តាយត្រូវបានសាច់ញាតិនិងក្រុមគ្រួសារយកទៅធ្វើបុណ្យតាមប្រពៃណី រីឯកូនប្រុស ត្រូវបានបញ្ជូនទៅសង្គ្រោះនៅមន្ទីរពេទ្យ៕
