ខេត្តកំពង់ស្ពឺ៖នៅថ្ងៃអង្គារ ទី ៩ ខែមិថុនា ឆ្នាំ២០២០ នេះ មន្ត្រី នៃសាខាកាកបាទក្រហមកម្ពុជា ខេត្តកំពង់ស្ពឺបានពាំនាំ ចុះសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជានិងបាននាំយកអំណោយមនុស្សធម៌ជួយសម្រាលការលំបាក ផ្តល់ជូនប្រជាពលរដ្ឋរងគ្រោះចំនួន ៤២៨គ្រួសារ (ក្នុងនោះ ៣គ្រួសារ រងគ្រោះដោយភ្លេីងឆេះផ្ទះ និង ៤២៥គ្រួសារ រងគ្រោះដោយខ្យល់កន្ត្រាក់កាលពីថ្ងៃទី ៥ ខែមិថុនា ឆ្នាំ២០២០កន្លងទៅ) រស់នៅក្នុងភូមិចំនួន២៨ ឃុំចំនួន៧ នៃស្រុកសំរោងទង ស្រុកឧដុង្គ និងស្រុកភ្នំស្រួច ខេត្តកំពង់ស្ពឺ។
គោលដៅទី១ ដឹកនាំដោយ លោកជំទាវ ពុំ ចន្ទីនី អគ្គលេខាធិការ កាកបាទក្រហមកម្ពុជា អញ្ជេីញចុះសួរសុខទុក្ខ និងផ្តល់អំណោយជូនប្រជាពលរដ្ឋរងគ្រោះចំនួន ៣៣៩គ្រួសារ (ក្នុងនោះរងគ្រោះដោយភ្លេីងឆេះផ្ទះ ៣គ្រួសារ) រស់នៅស្រុកសំរោងទង។ ចំណែកឯ គោលដៅទី២-ទី៣ ដឹកនាំដោយ ឯកឧត្តមវេជ្ជ. អ៊ុយ សំអាត នាយកនាយកដ្ឋានគ្រប់គ្រងគ្រោះមហន្តរាយ កាកបាទក្រហមកម្ពុជា អញ្ជេីញចុះសួរសុខទុក្ខ និងផ្តល់អំណោយជូនប្រជាពលរដ្ឋរងគ្រោះចំនួន ៨៩គ្រួសារ រស់នៅស្រុកសំរោងទង ស្រុកឧដុង្គ និងស្រុកភ្នំស្រួច។
ក្នុងឱកាសជួបសំណេះសំណាលជាមួយប្រជាពលរដ្ឋទាំងអស់ គណៈប្រតិភូកាកបាទក្រហមកម្ពុជា បានពាំនាំប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងព្រះរាជបណ្តាំរបស់ សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា ដែលផ្តាំផ្ញេីសួរសុខទុក្ខ ក្តីនឹករលឹក និងក្តីអាណិតអាសូរ ជាពិសេស ក្តីព្រួយបារម្ភចំពោះជីវភាពបងប្អូនប្រជាពលរដ្ឋនៅគ្រប់ទីកន្លែងទាំងអស់ ដែលប្រឈមទៅនឹងឧបទ្ទវហេតុគ្រោះធម្មជាតិ ដែលកេីតឡេីងដោយមិនអាចស្មានបាន។
ហេតុដូចនេះហេីយ សម្តេចកិត្តិព្រឹទ្ធបណ្ឌិតប្រធាន បានចាត់ឱ្យមន្ត្រីក្រោមឱវាទចុះជួយបងប្អូនប្រជាពលរដ្ឋរងគ្រោះទាំងអស់ ដោយនាំយកនូវគ្រឿងបរិភោគ សម្ភារប្រេីប្រាស់ និងថវិកាមួយចំនួន ដេីម្បីជួយសម្រាលការលំបាកទៅតាមស្ថានភាពរងគ្រោះជាក់ស្តែងរបស់គ្រួសាររងគ្រោះធ្ងន់-ស្រាលនីមួយៗ ព្រមទាំងបានពាំនាំនូវសារអំពាវនាវ ឱ្យមានការប្រុងប្រយ័ត្នគ្រប់ពេលវេលា តាមរយៈ ការតាមដានសេចក្តីជូនដំណឹងស្តីពីស្ថានភាពអាកាសធាតុ របស់ក្រសួងធនធានទឹក និងឧតុនិយម និងវិធានការត្រៀមបង្ការផ្សេងៗទៀត។
ជាមួយគ្នានេះ គណៈប្រតិភូ បានពាំនាំសេចក្តីអំពាវនាវរបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដល់ប្រជាពលរដ្ឋទាំងអស់ សូមបន្តចូលរួមអនុវត្តតាមការអំពាវនាវរបស់សម្តេចតេជោនាយករដ្ឋមន្ត្រី និងត្រូវមានស្មារតីប្រុងប្រយ័ត្នខ្ពស់ជានិច្ចក្នុងការទប់ស្កាត់រលកទីពីរនៃការចម្លងវីរុសកូវីដ-១៩នៅកម្ពុជា តាមរយៈការអនុវត្តនូវវិធានការជាបន្តបន្ទាប់របស់ក្រសួងសុខាភិបាល ជាពិសេសការរក្សាអនាម័យដៃស្អាត ពាក់ម៉ាស (ក្នុងករណីចាំបាច់) ប្រេីកន្សែងឬក្រមាឬក្រដាសជូតមាត់សម្រាប់ខ្ទប់មាត់ពេលក្អក ឬកណ្តាស់ និងការរក្សាគម្លាតសុវត្ថិភាពសង្គម និងគម្លាតសុវត្ថិភាពបុគ្គល។ ទន្ទឹមនឹងនេះ សូមប្រជាពលរដ្ឋទាំងអស់ យកចិត្តទុកដាក់ គិតគូរពីសុវត្ថិភាពចរាចរណ៍ ត្រូវគោរពច្បាប់ចរាចរណ៍ឱ្យបានខ្ជាប់ខ្ជួន ដេីម្បីទប់ស្កាត់សោកនាដកម្មនៃគ្រោះថ្នាក់ចរាចរណ៍ដែលកេីតមានឡេីងជារៀងរាល់ថ្ងៃ និងត្រូវរួមគ្នាថែរក្សាសន្តិភាព រស់នៅជាមួយគ្នាប្រកបដោយភាពសុខដុមរមនា និងខិតខំប្រកបរបរបង្កបង្កេីនផលដេីម្បីលេីកកម្ពស់ជីវភាពគ្រួសារ។
សូមបញ្ជាក់ផងដែរថា គ្រួសាររងគ្រោះនីមួយៗទទួលបានអំណោយមនុស្សធម៌ពីកាកបាទក្រហមកម្ពុជា រួមមាន៖ អង្ករ ៣០គីឡូក្រាម មី ១កេស ត្រីខ ១០កំប៉ុង និងឃីត១ (មុង ភួយ សារុង ក្រមា អាវយឺត) ដូចៗគ្នា។ ដោយឡែក គ្រួសាររងគ្រោះដោយរលំផ្ទះទាំងស្រុង ទទួលបានបន្ថែម តង់ចំនួន១ និងថវិកា ២០ម៉ឺនរៀល។ ចំពោះគ្រួសាររងគ្រោះច្រេីនជាង៥០% ទទួលបានបន្ថែម តង់ចំនួន១ និងថវិកា ១០ម៉ឺនរៀល ហើយគ្រួសាររងគ្រោះដោយអន្លេី ទទួលបានបន្ថែមថវិកា ៥ម៉ឺនរៀល។ ចំពោះគ្រួសាររងគ្រោះដោយភ្លេីងឆេះផ្ទះ ទទួលបានក្នុង ១គ្រួសារៗ អង្ករ ៥០គីឡូក្រាម តង់១ កន្ទេល១ ឃីត១ ទឹកត្រីទឹកស៊ីអ៉ីវ ១យួរទឹកដោះគោ ១កំប៉ុង ប្រេងឆា១ដប នំធុង ១ធុង និងថវិកា ៤០ម៉ឺនរៀល៕
