ខេត្តកំពង់ឆ្នាំងៈ នៅថ្ងៃទី៤ ខែកញ្ញា ឆ្នាំ២០២៣ លោក អម សុភា អភិបាលរងខេត្តកំពង់ឆ្នាំងបានដឹកនាំក្រុមការងារបើកយុទ្ធនាការកំណត់អត្តសញ្ញាណ សម្ភាសន៍ផ្តល់បណ្ណសមធម៌ ជូនបុគ្គល ឬគ្រួសារ មានសមាជិកបម្រើការក្នុងសេវាកម្សាន្តទេសចរណ៍នៃសេដ្ឋកិច្ចក្រៅប្រព័ន្ធ នៅសង្កាត់កំពង់ឆ្នាំងក្រុងកំពង់ឆ្នាំង ខេត្តកំពង់ឆ្នាំង។
ឯឮលោក ឌឹម ឌន ឌន ប្រធានមន្ទីរផែនការខេត្តកំពង់ឆ្នាំង បានបញ្ជាក់អោយដឹងថាៈគ្រួសារក្រីក្រចំនួន ២៧ ៧៨៣
គ្រួសារ បានទទួលការបើកផ្តល់សាច់ប្រាក់ពីរាជរដ្ឋាភិបាល ទន្ទឹមនឹងនោះរាជរដ្ឋាភិបាលបានលើកកម្ពស់សុខុមាលភាពមាតា និងទារក ព្រមទាំងរួមចំណែកបញ្ហាកង្វះអាហារូបត្ថម្ភរបស់កុមារ ក្នុងគ្រួសារក្រីក្រចាប់តាំងពីកូនក្នុងផ្ទៃរហូតដល់អាយុ២ឆ្នាំ ជំរុញដល់ការលូតលាស់ទាំងកាយសម្បទា ទាំងបញ្ញាស្មារតីចាប់ពីខែមិថុនា ឆ្នាំ២០១៩មក រាជរដ្ឋាភិបាល បានអនុវត្តនូវកម្មវិធីឧបត្ថម្ភសាច់ប្រាក់ជូនស្រ្តីមានផ្ទៃពោះ និងកូនអាយុក្រោម២ឆ្នាំ នៃគ្រួសារក្រីក្រដែលមានប័ណ្ណសមធម៌ ឬ ប័ណ្ណអាទិភាព ដែលនៅខេត្តកំពង់ឆ្នាំងយើងបានគិតត្រឹមថ្ងៃទី២២ ខែសីហា ឆ្នាំ២០២៣ បានឧបត្ថម្ភសាច់ប្រាក់ជូនស្រី្តមានផ្ទៃពោះ ចំនួន ៦ ០៨០ នាក់ កុមារអាយុក្រោម២ឆ្នាំ ចំនួន ១ ៩២២នាក់ ។
លោក អម សុភា បានមានប្រសាសន៍បញ្ជាក់ថាៈដើម្បីអភិវឌ្ឍសេដ្ឋកិច្ច-សង្គមឲ្យកាន់តែមានការរីកចម្រើនរាជរដ្ឋាភិ
បាលបានអនុម័តក្របខ័ណបណ្តាគោលនយោបាយជាតិគាំពារសង្គម ២០១៦-២០២៥ បានផ្តោតលើសសរស្តម្ភពីរគឺ ប្រព័ន្ធជំនួយសង្គម និងប្រព័ន្ធសន្តិសុខសង្គម ដែលមានគោល
បំណងដើម្បីធានាឱ្យបាននូវសន្តិសុខប្រាក់ចំណូល និងកាត់បន្ថយភាពងាយរងគ្រោះផ្នែកសេដ្ឋកិច្ច និងហិរញ្ញវត្ថុរបស់ប្រជាជន សំដៅលើកកម្ពស់សុខុមាលភាពនិងសាមគ្គីភាពសង្គម ព្រមទាំងកាត់បន្ថយភាពក្រីក្ររបស់ប្រជាជន។
ជាពិសេសកន្លងទៅគ្រួសារក្រីក្រ និងគ្រួសារដែលងាយរងហានិភ័យដោយគ្រោះទឹកជំនន់ និងគ្រួសារងាយរងហានិ
ភ័យ ដោយសម្ពាធអតិផរណា បានទទួលការបើកផ្តល់សាច់ប្រាក់នៃគោលនយោបាយគាំពារសង្គមរបស់រាជរដ្ឋាភិបាល ។
ក្នុងនោះរាជរដ្ឋាភិបាលក៏បានអនុវត្តកម្មវិធីប្រព័ន្ធមូលនិធិសមធម៌សុខាភិបាលចំពោះក្រុមគោលដៅនៃជនងាយរងគ្រោះ ដូចជាអ្នកផ្ទុកមេរោគអេដស៍ និងអ្នកជំងឺអេដស៍ ជនមានពិការភាព អតីតយុទ្ធជន និងក្រុមគោលដៅនៃជនងាយរងគ្រោះផ្សេងៗទៀត ដើម្បីឲ្យពួកគាត់បានទទួលសេវាសុខាភិបាលក្នុងការពិនិត្យសុខភាព ការព្យាបាលជំងឺ ដោយពុំមានបង់ថ្លៃសេវានៅតាមមូលដ្ឋានសុខាភិបាលសាធារណៈរបស់រដ្ឋ និងមូលដ្ឋានសុខាភិបាលឯកជនដែលមានចុះកិច្ចសន្យាជាមួយបេឡាជាតិសន្តិសុខសង្គម(ប.ស.ស)។
ជាពិសេសថ្មីៗនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានធ្វើការប្តេជ្ញា និងធានាអនុវត្តឱ្យបានសម្រេចជោគជ័យនូវ «កម្មវិធីនយោបាយរបស់រាជរដ្ឋាភិបាល» និងផ្តោតការយកចិត្តទុកដាក់លើ កម្មវិធីគោលនយោបាយជាអាទិភាពទាំង ៦ ដែលនឹងត្រូវបានដាក់ឱ្យចាប់ផ្តើមអនុវត្តភ្លាមនៅក្នុងឆ្នាំ ២០២៣ នេះ រួមមាន ៖
(១). ការពង្រីកសេវាថែទាំសុខភាពឆ្ពោះទៅរកការគ្របដណ្តប់សុខភាពជាសកល;
(២). ការបណ្តុះបណ្តាលជំនាញវិជ្ជាជីវៈ និង បច្ចេកទេស ជូនដល់យុវជនមកពី គ្រួសារក្រីក្រ និង គ្រួសារងាយរងហានិភ័យនៅទូទាំងប្រទេស
(៣). ការធ្វើស្ថាបនូបនីយកម្មកម្មវិធីជាតិជំនួយសង្គម សម្រាប់គ្រួសារក្រីក្រ, ក្រុមជន ងាយរងគ្រោះនៅក្នុងគ្រួសារក្រីក្រ និង គ្រួសារងាយរងហានិភ័យ នៅក្នុងគ្រាមានវិបត្តិសេដ្ឋ-កិច្ច និងគ្រាមានគ្រោះអាសន្ន
(៤). ការដាក់ចេញ និងការជំរុញ អនុវត្តយុទ្ធសាស្ត្រអភិវឌ្ឍសេដ្ឋកិច្ចក្រៅប្រព័ន្ធ ឱ្យមានលទ្ធភាពចូលរួមក្នុងសេដ្ឋកិច្ចក្នុងប្រព័ន្ធ និងអាចទទួលបានផលប្រយោជន៍ពីប្រព័ន្ធ គាំពារសង្គមផ្លូវការ
(៥). ការដាក់ចេញនូវយន្តការសម្របសម្រួល និងកម្មវិធីហិរញ្ញប្បទាន សំដៅលើក ស្ទួយផលិតកម្ម, រកទីផ្សារ និង រក្សាលំនឹងថ្លៃកសិផលសំខាន់ៗ ក្នុងកម្រិតសមរម្យ និង
(៦). ការដាក់ពង្រាយមន្ត្រីបច្ចេកទេសកសិកម្មទៅគ្រប់ឃុំ-សង្កាត់ ដែលមាន សកម្មភាពកសិកម្ម នៅទូទាំងប្រទេស និង ការរៀបចំឱ្យមានសមាគមកសិករនៅតាមទី ជនបទ ។
ករណីមូលនិធិជាតិជំនួយសង្គមក៏មានឆន្ទៈក្នុងការពង្រីកវិសាលភាពកម្មវិធីជំនួយសង្គម សំដៅ គ្របដណ្តប់លើមនុស្សគ្រប់វ័យ ជាក់ស្តែងគឺបាននឹងកំពុងរៀបចំ «កម្មវិធីជំនួយសង្គមក្នុងកញ្ចប់គ្រួសារ» ដែលត្រូវធ្វើសមាហរណកម្មកម្មវិធីជំនួយសង្គមបញ្ចូលគ្នា ក្នុងកញ្ចប់តែមួយ រួមមានកម្មវិធីឧបត្ថម្ភសាច់ប្រាក់ជូនស្រ្តីមានផ្ទៃពោះ និងកុមារអាយុក្រោម២ឆ្នាំ កម្មវិធីឧបត្ថម្ភសាច់ប្រាក់ជូនជនមានពិការភាព កម្មវិធីឧបត្ថម្ភសាច់ប្រាក់ដល់សិស្សក្រីក្រនៅបឋមសិក្សា និងមធ្យមសិក្សា កម្មវិធីឧបត្ថម្ភសាច់ប្រាក់ជូនមនុស្សវ័យចាស់អាយុ៦០ឆ្នាំឡើង និងកម្មវិធីឧបត្ថម្ភសាច់ប្រាក់ជូនអ្នកផ្ទុកមេរោគអេដស៏និងជំងឺអេដស៏ ហើយគ្រោងដាក់ឱ្យដំណើរការនៅដើមឆ្នាំ២០២៤ខាងមុខនេះ ៕
